Ýalňyzlyk teswiri

Tomsuň güni Günüň aşagynda üşemek ýaly bir duýgy bu söýülmezlik. Diýersiň ki "Howa gyzgyn, Gün depämi deşip gelýär", ýöne şol wagt endamyň tikenekläp gider welin senem titrärsiň. Nämeden? Sowukdanmy? Ýok, ýanyňda biri öz oguljygyny gujaklap, söýgüläp durandyr. Parhy ýok, ejesimi ol, kakasymy? Ýöne sen bu ýagdaýy geň görersiň, birzatlar içiňde çisňäp gider, çünki öz wagtynda söýülmändiň... 

Ýyljajyk pejiň ýanynda oturansyň, endamyň gyzyp gidendir, ýöne sen entägem ýylanyp bileňoksyň... Çünki o sowuk seniň endamyňda däl - kalbyňda. Edil şol pursat ene gujagyny küýsärsiň, ýa-da ataň saçyňy sypasyn islärsiň. Hamala şu ýönekeýje zatlar seni ýyladaýjakdyr göwnüňe... Ýöne ne ene bardyr, ne-de ata. Seniň küýsegiň gyzgynlyk däl - mähir. Parhyna barýançaň özüňe ezýet baryny berensiň. Entägem pejiň ýylysyna çoýunyp şondan mähir gözleýänsiň. Ýöne ne demir, ne-de ýüň saňa mähir berer. Seniň gözlegiň söýgi!

Ynsan ogly käte söýgi küýseýär... Garşysyndaky diňleýjiden, köçedäki ötegçiden, ýoldaky ýolagçydan... Ynsan ogly söýgi küýseýär, bir pursatlyk söýgi. Käte derdine derman bolar, şondan güýç alyp ýoluna dowam eder. Käte bolsa şol söýgi ömrüne many berer ynsanyň. Ondan özüne meňzeşje, kiçijek, iki aýakly, iki elli naşyja bir eziz dogular... Ýöne haçan gerek, nirde gerek, kimden gerek? Ine parhyna barmasy kyn bolan zatlar! 

Ynsan ogly käte söýgi küýseýär... Eger senem şu ýazanlaryma düşünen bolsaň, onda belki senem ýalňyzsyň we belki saňa-da söýgi ýetenokdyr?!